pulis sa paliparan ng Paris
nagulantang
sa bagong dating na kulay-lupang pulutong
parang mga duhat sa alpombrang puti
saan kayo galing? passport
saan kayo pupunta? hinto
bakit kay narito? sunod kayo dito
paulit-ulit na sinipat, sinuri, kinusot, pinitik, sinundot
ang pamburol na litrato sa pasaporte at tatak na visa
baka peke, baka ilegal, baka kriminal
habang hinahanap ng isip
ang kubo sa Bukidnon, dampa sa Botolan, apartment sa Tondo
labadang nakasampay
at nakasalang na sinigang
paulit-ulit na sinipat, sinuri, kinusot, pinitik, sinundot
ang pamburol na litrato sa pasaporte at tatak na visa
habang hinahampas ng hanging bagyo
ang damong bubong ng dampa
pinarupok ng di-mabilang
na tag-ulan at tag-araw
baka peke, baka ilegal, baka kriminal
habang idinuduyan ang sarili
sa kandungan ng kinagisnang
sinaunang punong mangga
na ayaw nang mamunga
tinatakan ang pasaporte at nakarating kami
sa Europa isang umaga
Unang Umaga sa Europa
ni Al Santos
Tula
Pasasalamat : oovrag.com
Walang komento:
Mag-post ng isang Komento