pulut-sepu da ring samut-samut pulung-pulung
metung baul kumpul-kumpul sinimpan tagimpan
lakuan-dasan ku aldoldo king kakung pagkeran.
Kesyo-ketal amanu kung selabat-pakibat
kiti-kiti namu ning gunam-gunam kung puyat
tayid-tayid, susyuk-busuk alipugpug pelisan
mibatibat king bikual-bikual kung panimanman.
Ing egana-ganang resa-resang bungisngis isip
karing balugbug buka-bukakang kurap-kurap
pirungut-rungut salu-salungat king akmulan
mangaklak yang sagakgak ing siguk lalamunan.
Antimurin tamual-tamualan ing lambi't kambe
daring mulagat lawe't wawang mangulate
urung-sulung paldak-sikad bitis kung mangapkap
sikmal-gamal buksi ning danupan kung paninap.
Kapilan mayuyut-lulut sinta mung pagkaymut
at malaglag kening siping pagkeran miglumut
salakban me'ing ulas-dase mapaling lingap
sulsiyan matalik kaul tagpi-tagping paninap.
Sulsi-Sulsing Isip Tagpi-Tagping Paninap
Tony Mercado Peña
Tula
Pasasalamat : oovrag.com
Walang komento:
Mag-post ng isang Komento